Əli Əsədov mühüm qərarlar imzaladı

Nazirlər Kabinetinin 7 iyul 2009-cu il tarixli qərarı ilə təsdiq edilən “Dövlət Taxıl Fondunun saxlanması və istifadəsi Qaydaları”nda dəyişiklik edilib.

Baş nazir Əli Əsədovun imzaladığı sənədə əsasən, fonddakı taxılın saxlanma müddəti onun məhsul ilindən etibarən 24 aydan artıq ola bilməz. Dövlət Sifarişçisi tərəfindən saxlanma müddəti başa çatmamış taxılın keyfiyyətli və təhlükəsiz saxlanmasını təmin etmək məqsədilə həmin məhsulun müvafiq hissəsi yenidən işlənilə bilər.

Bundan əlavə, Nazirlər Kabineti “Ölkənin istehlak bazarında strateji əhəmiyyətli malların Siyahısı”nı da təsdiq edib. Qərarda dəyişiklik Prezident İlham Əliyevin 24 avqust 2002-ci il tarixli fərmanı ilə təsdiq edilən “İcra hakimiyyəti orqanlarının normativ hüquqi aktlarının hazırlanması və qəbul edilməsi qaydası haqqında Əsasnamə”yə uyğun edilə bilər.

Bununla yanaşı, “Fövqəladə hallarda istifadə olunması nəzərdə tutulan dövlət ehtiyatlarının nomenklaturası” da təsdiqlənib.

Yeniliyə əsasən, Maliyyə Nazirliyi nomenklaturası təsdiq edilən fövqəladə hallarda istifadə olunması nəzərdə tutulan dövlət ehtiyatlarının yaradılmasının bu ildə maliyyələşdirilməsinə dair təkliflərini hökumətə təqdim etməli, Dövlət Ehtiyatları Agentliyi bu qərardan irəli gələn digər məsələləri həll etməlidir.