Hikmət Hacıyev, Emin Əmrullayev və Rövşən Nəcəfin iştirakı ilə konfrans keçirildi

ADA Universitetində “Heydər Əliyevin uğurlu xarici siyasəti və Azərbaycanın yeni neft strategiyası” mövzusunda konfrans keçirilib.

Tədbirdə Prezidentin köməkçisi Hikmət Hacıyev, elm və təhsil naziri Emin Əmrullayev, SOCAR-ın prezidenti Rövşən Nəcəf və digərləri iştirak ediblər.

Konkfransdan öncə iştirakçılar ulu öndər Heydər Əliyevin 100 illik yubileyinə həsr olunan sərgi ilə tanış olublar. Dövlət himninin səsləndirilməsi ilə başlayan tədbirdə şəhidlərimizin əziz xatirəsi bir dəqiqəlik sükutla yad edilib.

Daha sonra ulu öndər Heydər Əliyev və gənclərə həsr olunan, həmçinin “Heydər Əliyev İli” çərçivəsində SOCAR-ın təşkilatçılığı ilə ali təhsil müəssisələrində keçirilən mühazirə və turları əks etdirən videoçarxlar nümayiş etdirilib.

ADA Universitetinin prorektoru Fariz İsmayılzadə “Heydər Əliyev İli” çərçivəsində universitetin təşkil etdiyi tədbirlər barədə məlumat verib.

Konfransda çıxış edən Prezidentin köməkçisi Hikmət Hacıyev müasir Azərbaycan dövlətçiliyinin təməlinin qoyulmasının və möhkəmləndirilməsinin bilavasitə ulu öndər Heydər Əliyevin adı ilə bağlı olduğunu qeyd edib. O, ümummilli liderin xalqın dəvəti ilə hakimiyyətə qayıdışından sonra ölkəmizin dinamik inkişafının əsas istiqamətlərinin müəyyənləşdirildiyini diqqətə çatdırıb.