Kənd təsərrüfatı istehsalında dinamika niyə qaneedici deyil? - Baku TV

Prezident İlham Əliyev kənd təsərrüfatı məsələlərinə həsr olunmuş müşavirədə kənd təsərrüfatının inkişafına dair yeni Dövlət Proqramından bəhs edərkən bildirib ki, bu sənəd çox konkret və qısamüddətli olmalıdır.

Qeyd edək ki, illik müqayisədə 2022-ci ildə kənd təsərrüfatı sahəsində məhsul istehsalında 3,4 % artım olsa da, 2023-cü ildə bu göstərici 3 %-ə, 2024-cü ildə 1,5 %-ə, 2025-ci ildə isə 0,9 %-ə enib. Azalma həm bitkiçilik, həm də heyvandarlıq sahəsində qeydə alınıb.

İqtisadçı Xalid Kərimli vəziyyəti bir neçə amillə izah edir. Onun sözlərinə görə, Azərbaycanda kənd təsərrüfatı sahəsində çalışanların sayı kifayət qədər çox olsa da, hər nəfərə düşən məhsul istehsalı dünya ölkələri ilə müqayisədə xeyli aşağıdır:

“Texnologiyadan pis istifadə, həmçinin aqrar idarəetmədəki çətinliklər və zəifliklər məhsuldarlığın aşağı olmasına gətirib çıxarır. İkinci əsas məsələ suvarma sistemləri ilə əlaqədardır. Suyun ilkin mənbədən son istehlakçıya çatdırılmasında kənd təsərrüfatı sahəsində itkilər 50-60 %-ə qədərdir. Yəni çatışmayan su çox pis şəkildə bölünür. Bunun özü ciddi problemdir. Digər tərəfdən, aqrar sektora hər il 100 milyonlarla pul, subsidiyalar ayrılsa da, bunun effektiv sistemi yoxdur”.

Ekspert hesab edir ki, kənd təsərrüfatına yönəldilən subsidiyalar məhsuldarlığın, istehsalın artmasına yox, daha çox fermerlərin xərclərinin kompensasiya edilməsinə xidmət edir.