KOBİA-nın sədri sərgilərin əhəmiyyətindən danışdı

Dekabrın 8-də Bakıda 1-ci Yerli İstehsalat və İstehsal Texnologiyaları Sərgisi işə başlayıb.

Sərgi İqtisadiyyat Nazirliyinin dəstəyi, nazirliyin tabeliyindəki Kiçik və Orta Biznesin İnkişafı Agentliyinin (KOBİA) və "Marsol Group"un birgə təşkilatçılığı ilə keçirilir. Sərgidə 100-ə yaxın yerli şirkətin istehsal etdiyi məhsullar və texnologiyalar təqdim edilir.

Sərginin açılış mərasimində çıxış edən KOBİA-nın İdarə Heyətinin sədri Orxan Məmmədov bildirib ki, bu gün dövlət ölkədə sahibkarlığın inkişafı üçün müxtəlif istiqamətlərdə geniş dəstək tədbirləri həyata keçirir:

“KOBİA olaraq biz bütün sahələrdə lazımi dəstəyi göstərməyə hazırıq. Biz artıq 6 ilə yaxındır fəaliyyətdəyik. Bu dövr ərzində sıx olaraq sahibkarlarla çalışmışıq. Xüsusilə də bizim alətlərimizdən biri də istər yerli, istərsə də xaricdə təşkil olunan sərgilərdə iştiraka dəstəkdir. Fəaliyyət göstərdiyimiz müddətdə bir çox sahibkara sərgidə təmsil olunmaq üçün şərait yaratmışıq”.