Kredit faizləri daha da yüksələcək? - “Bankların xərci artıb...” - Baku TV

Azərbaycanda yeni verilmiş kreditlərin orta faizləri son aylara qədər azalmağa doğru getsə də, mayda orta faiz göstəricisində yenidən artım qeydə alınıb.

Maraqlıdır ki, eyni dövrdə depozitlərin və əmanətlərin orta faiz göstəricisində azalma olub.

Belə ki, may ayında kreditlərin orta faizi 17,92 %-ə ensə də, iyunda 18,3 %-ə yüksəlib. Həmçinin mayda 7,99 % olan depozit faizləri isə iyunda bir az da düşərək 7,96 % təşkil edib.

Qeyd edək ki, kreditlər əsasən depozitlər hesabına verilir.

Mərkəzi Bankın son məlumatına görə, depozitlərin 45,2 %-i fiziki şəxslərin vəsaitlərindən ibarət olub.

Bəs depozit və əmanət faizlərinin azalmasına baxmayaraq, kredit faizlərinin artması nə ilə bağlıdır?

İqtisadçı Xalid Kərimlinin sözlərinə görə, depozit faizlərinin aşağı düşməsi kredit faizlərinin də mütləq şəkildə azalacağı anlamına gəlmir:

“Məsələ burasındadır ki, depozit faizi bankın resurs cəlbetmə faizi, kredit faizi isə həmin resursların satış qiymətidir. Depozit faizləri müxtəlif səbəblərdən, o cümlədən vəsait yerləşdirmək istəyən depozitarların çoxluğu fonunda düşə bilər, yəni bankın əlavə resursa ehtiyacı olmadıqda o, depozit faizlərini aşağı salır. Beləliklə, depozit faizlərinin aşağı səviyyədə qaldığı bir şəraitdə belə kredit faizləri yüksələ bilər”.