Mikayıl Cabbarovdan özəlləşdirilmə ilə bağlı açıqlama

“2023-cü ilin 10 ayında 208 müəssisə və obyekt, 9 açıq səhmdar cəmiyyətinin səhmləri və 91 dövlət mülkiyyətində olan torpaq sahəsi özəlləşdirilib. Özəlləşdirmədən dövlət büdcəsinə 104 milyon manata yaxın vəsait daxil olub və 10 aylıq proqnoz 116%-dən çox icra edilib”.

Bunu Milli Məclisin noyabrın 13-də keçirilən plenar iclasında nazir Mikayıl Cabbarov bildirib.

“Ölkə başçısının müvafiq Sərəncamına əsasən, 8 iri dövlət müəssisəsinin restrukturizasiyası və sağlamlaşdırılması, onların fəaliyyət səmərəliliyinin artırılması, özəl investisiyaların cəlb edilməsi məqsədilə həmin müəssisələrdə dövlətin iştirak paylarının azaldılması, bununla yanaşı, müvafiq sahələrdə liberallaşdırma və inhisarsızlaşdırma imkanlarının nəzərdən keçirilməsinə dair təkliflərin hazırlanması istiqamətində də tədbirlər həyata keçirilir. Bununla əlaqədar nüfuzlu beynəlxalq məsləhətçi şirkətlər də cəlb edilib", – deyə nazir əlavə edib.