Naxçıvan hava limanının fəaliyyətində nöqsanlar

Hesablama Palatası Naxçıvan Beynəlxalq Hava Limanı və onun tabeliyində olan “Aeroport Taksi” MMC-də 2023-cü ilin fevralın 15-dən martın 18-dək apardığı yoxlamalar zamanı bir sıra nöqsanlar aşkar edib.

Audit yoxlamaları 2021-2022-ci illəri əhatə edib. Həmin dövrdə hava limanının xərcləri 28 milyon 471 min 323 manat, gəlirləri isə 20 milyon 631 min 647 manat təşkil edib.

Hava gəmilərinə texniki xidmət, sərnişinlərin təhlükəsizlik yığımı və hava gəmilərinin təhlükəsizlik xidmətinin haqları özəl aviaşirkətlə bağlanan müqavilənin şərtlərinə daxil edilməyib. Bu xidmətlərin göstərilməsinə baxmayaraq, hava limanı 288 529 manat xidmət haqqının özəl aviaşirkətdən alınmasını təmin etməyib.

Yoxlamanın nəticələrinə görə, hava limanının Aerovağzal və Aviakassa binalarında fiziki və hüquqi şəxslərə icarəyə verilən qeyri-yaşayış sahələri üzrə icarə sahəsi az göstərilib. İcarədarlardan vəsait az hesablanaraq alınmayıb.

Azərbaycan Prezidentinin müvafiq fərmanının tələbinə əməl edilməyərək dövlət əmlakının icarəyə verilməsində 59 615 manat vəsaitin 50%-i, yəni 29 807 manatı, “Aeroport Taksi” MMC ilə dövlət əmlakının icarəyə verilməsində 36,4 min manat icarə haqqının 50%-i, yəni 18,2 min manatı dövlət büdcəsinə ödənilməyib.