Neftçilər Günü münasibətilə tədbir keçirilib

“Əsrin müqaviləsi”nin imzalanmasının 31-ci ildönümü və Neftçilər Günü peşə bayramı münasibətilə tədbir keçirilib.

Tədbir zamanı Azərbaycanın dövlət suverenliyi və Ümummilli Liderin müəllifi olduğu Azərbaycanın enerji siyasətini əks etdirən videoçarx nümayiş etdirilib.

Tədbirdə çıxış edən SOCAR prezidenti Rövşən Nəcəf Dövlət Suverenliyi Günü və Neftçilər Günü peşə bayramı münasibətilə təbriklərini çatdırıb.

Həyata keçirilən strateji layihələrin Azərbaycanın regional liderə çevrilməsinə geniş imkanlar yaratdığını deyən SOCAR prezidenti Bakı-Tbilisi-Ceyhan əsas ixrac neft boru kəməri, Cənub Qaz Dəhlizi, eləcə də TANAP və TAP kimi qaz boru kəmərlərinin ölkəmizin enerji resurslarının dünya bazarına çıxışını təmin etdiyini və Avropanın enerji təhlükəsizliyində mühüm rol oynadığını vurğulayıb.

Son illər əldə olunan nailiyyətlərdən bəhs edən Rövşən Nəcəf bu gün Azərbaycan təbii qazının dünyanın 14 ölkəsinə ixrac olunmasından, SOCAR-ın beynəlxalq enerji şirkətinə çevrilməsi istiqamətində atılan mühüm addımlardan bəhs edib. Şirkətin fəaliyyət coğrafiyasının da genişləndiyini bildirib.

Daha sonra fəaliyyətdə fərqlənən bir qrup neftçi “Fəxri neftçi” döş nişanı və Fəxri fərmanla təltif olunub.

Tədbir çərçivəsində həmçinin “SOCAR Könüllüləri” qrupunun yeni üzvlərinin təqdimatı olub. Tədbir vətənpərvər ruhda və neftçilərə həsr olunan konsert proqramı ilə davam etdirilib.