Qırğızıstandan azad edilmiş yaylaqlara daha 116 baş yak gətirildi

Qırğızıstan hökuməti Azərbaycanda ətlik istiqamət üzrə ixtisaslaşmış eksperimental yak təsərrüfatının daha da inkişaf etdirilməsi məqsədilə ölkəmizə yak hədiyyə edib.

Qırğızıstan Prezidenti Sadır Japarovun Prezident İlham Əliyevə şəxsi hədiyyəsi olan yaklar artıq Kəlbəcər ərazisində təbiətə buraxılıb.

Ölkəmizə gətirilən yakların seçim prosesində Kənd Təsərrüfatı Nazirliyinin nümayəndələri iştirak ediblər. Seçilmiş yaklar əvvəl karantin rejimində saxlanılıb, onlara müvafiq peyvəndlər vurulub.

Qeyd edək ki, Azərbaycan Kənd Təsərrüfatı Nazirliyinin nümayəndələri ölkəmizə gətirmək üçün 82 dişi, 19 erkək yak seçiblər. 5 günlük karantin rejimi dövründə seçilmiş dişi yaklardan 15-i balalayıb. Doğulan buzovlardan 6-sı erkək, 9-u isə dişidir.

Xatırladaq ki, işğaldan azad edilmiş ərazilərdəki yaylaqlarda eksperimental yak təsərrüfatının yaradılmasına 2022-ci ildə başlanılıb.