"Azərenerji" Naxçıvanda böyük layihəni gerçəkləşdirir | İşlər nə vaxt bitəcək?

"Azərenerji" ASC Naxçıvan Muxtar Respublikasının enerji təhlükəsizliyini tamamilə yenidən qurmaq məqsədilə irimiqyaslı layihəyə start verib. Müasir infrastrukturun yaradılması hədəflənən layihə çərçivəsində istismar müddətini başa vurmuş "Babək", "Çeşməbasar" və "Naxçıvan" yarımstansiyaları tamamilə sökülərək ən son texnologiyalar əsasında yenidən inşa edilir. Regionun rəqəmsal enerji idarəetməsinə keçidini təmin edəcək Naxçıvan Regional Rəqəmsal İdarəetmə və SCADA Mərkəzinin qurulması da bu yenidənqurma prosesinin əsas tərkib hissəsidir. Layihə çərçivəsində həmçinin ötən əsrin ortalarından qalan hava elektrik verilişi xətləri sökülür və "Culfa", "Ordubad-1", "Ordubad-2" istiqamətlərində 68 kilometrlik yeni yüksəkgərginlikli ötürmə xətləri çəkilir. "Azərenerji" Naxçıvan Enerji Şəbəkəsinin rəhbəri Məhərrəm Abbasovun verdiyi məlumata görə, bütün bu strateji işlərin 2027-ci il ərzində yekunlaşdırılması nəzərdə tutulur. Bu tədbirlər regionun enerji dayanıqlılığını artırmaqla bərabər, sənaye və sosial obyektlərin fasiləsiz elektrik təminatına zəmanət verəcək.