"Biznes Mərkəzi Klubu"nun təşkilatçılığı ilə Beynəlxalq Pərakəndə Zirvəsi 2024 tədbiri keçirildi

Bakıda ilk dəfə olaraq Beynəlxalq Pərakəndə Zirvəsi keçirilib.

Biznes Mərkəzi Klubunun təşkilatçılığı ilə keçirilmiş tədbirə yerli və xarici ölkələrdən tanınmış iş adamları qatılıblar.

Tədbiri giriş nitqi ilə açan Biznes Mərkəzi Klubunun İdarə Heyətinin sədri Rüfət Nadirli bildirib ki, Beynəlxalq Pərakəndə Zirvəsinin keçirilməsində məqsəd pərakəndə sektorda fəaliyyət göstərən sahibkarlar arasında əlaqələrin yaradılması, qarşılıqlı əməkdaşlığın formalaşdırılmasıdır.

Bu baxımdan tədbirin keçirilməsində böyük səylərin göstərildiyini diqqətə çatdıran natiq sahibkarların dəstəyini də vurğulayıb.

Milli Məclisin deputatı Ceyhun Məmmədov isə bildirib ki, hazırda dünyada aktual mövzulardan biri rəqəmsal hökumətin qurulması, eyni zamanda elektron ticarətin inkişaf perspektivləridir.

Digər millət vəkili Müşfiq Cəfərov isə Azərbaycanın pərakəndə ticarət dövriyyəsinin göstəricilərindən danışaraq onun artırılmasının vacibliyini qeyd edib.

Kiçik və Orta Biznesin İnkişafı Agentliyinin şöbə müdiri Altun Yasinli və Azərbaycan Sahibkarlar Konfederasiyasının vitse-prezidenti Vüqar Zeynalov Beynəlxalq Pərakəndə Zirvəsinin əhəmiyyətindən bəhs edərək tədbirin sahibkarlar arasında korporativ əlaqələrə və pərakəndə sektorda fəaliyyət göstərən mikro, kiçik və orta biznesin inkişafına töhfə verdiyini vurğulayıblar.

Beynəlxalq Pərakəndə Zirvəsində daha sonra 3 istiqamətdə panel müzakirələri aparılıb. Yerli və xarici sahibkarlar arasında müxtəlif mövzularda diskussiyalar edilib.

Tədbirdə həmçinin bədii hissə olub. Eyni zamanda bir qrup şirkət təşəkkürnamə ilə təltif edilib. Bundan başqa, viktorina keçirilib və qaliblər İstanbul və Dubaya səhayət paketləri ilə mükafatlandırılıb. Qeyd edək ki, Beynəlxalq Pərakəndə Zirvəsinin hər il keçirilməsi nəzərdə tutulub. Qarşıdakı illərdə tədbirə daha çox xarici ölkədən sahibkarların qatılması planlaşdırılıb.