"Gələcəyin limanı" | SOCAR və dünya nəhəngi MSC arasındakı tarixi sazişin detalları

Azərbaycan Dövlət Neft Şirkəti ilə dünyanın ən böyük daşıma şirkəti olan "Mediterranean Shipping Company" arasında strateji əməkdaşlığa dair saziş imzalanıb.

SOCAR-ın yaydığı məlumata görə, tərəflər Egey bölgəsinin ən böyük konteyner limanı olan "SOCAR Terminalı"nda birgə investisiyalar vasitəsilə Türkiyənin qlobal təchizat zəncirində mövqeyini gücləndirməyi hədəfləyirlər.

Razılaşmaya əsasən, "Mediterranean Shipping Company"nin törəmə şirkəti və qlobal terminal operatoru "Terminal Investment Limited" "SOCAR Terminalı"nda səhmdar olacaq.

Egey bölgəsinin ən böyük konteyner terminalı olan "SOCAR Terminal" 700 metrlik fasiləsiz körpü, 16 metrlik dərinlik, 420 min kvadratmetr liman ərazisi və 30 min kvadratmetr arxa sahəsi ilə həm regional, həm də qlobal ticarət üçün strateji əhəmiyyət daşıyır.

"Gələcəyin limanı" konsepsiyası ilə fəaliyyət göstərən "SOCAR Terminal" ən yüksək əmək mühafizəsi və təhlükəsizlik standartlarını tətbiq edir, rəqəmsallaşma və texnologiyaya qoyulan sərmayələrlə sənayedə qabaqcıl mövqeyini qoruyur.