"SOCAR Türkiyə" və GİRVAK "Qadın Enerjisi Proqramı"nın icrasına başladı

Azərbaycan Dövlət Neft Şirkətinin törəməsi, Türkiyənin ən böyük birbaşa xarici investoru və inteqrə olunmuş sənaye qrupu – “SOCAR Türkiyə” və Türkiyə Sahibkarlıq Fondu “Qadın Enerjisi Proqramı”nın icrasına başlayıb.

Bu barədə “SOCAR Türkiyə” məlumat yayıb.

Məlumata görə, proqram İzmirin Aliağa bölgəsində yaşayan, təhsilli olmayan və işləməyən qadınların sosial-iqtisadi baxımdan gücləndirilməsini hədəfləyən 8 aylıq layihədir. Proqram çərçivəsində qadınlara kompüterdən istifadə kimi əsas bacarıqlardan tutmuş sahibkarlıq kimi peşəkar bacarıqlara qədər geniş spektrdə təlimlər və seminarlar təqdim olunur.

Eyni zamanda şəxsi inkişaf sahəsində özünəinamın artırılması və stresin idarə olunması kimi mövzular üzrə təlimlər təşkil edilir. Məqsəd qadınlara lazımi bilik və bacarıqları qazandırmaq, güclü sosial şəbəkələr yaratmaqla onların motivasiya və özünəinamını artırmaqdır.

Proqram çərçivəsində maliyyə savadlılığı və e-ticarət kimi iqtisadi bacarıqlara yönəlmiş təlimlər də keçirilir. Bu, iştirakçıların iqtisadi müstəqillik qazanmasına və regional inkişafda iştirak etməsinə dəstək məqsədi daşıyır.