Serbiya Azərbaycandan nə qədər qaz tədarük etməyi planlayır? - Baku TV

Serbiya alternativ qaz mənbələrindən, o cümlədən Cənub Qaz Dəhlizi vasitəsilə ötürülən Azərbaycan təbii qazından istifadə etmək imkanını ilk dəfə məhz 2023-cü ildə qazanıb. Artıq ardıcıl olaraq üçüncü ildir Azərbaycandan qaz idxalı həyata keçirilir və buna paralel olaraq baza generasiyasının yeni mənbəyinə çevrilmək və enerji təhlükəsizliyinin səviyyəsini artırmaq məqsədi daşıyan qaz elektrik stansiyasının inşası üzərində birgə iş aparılır. SOCAR-ın bu layihədə sadəcə qaz tədarükçüsü rolunda deyil, həm də qaz elektrik stansiyasının tikintisi və inkişafı üzrə strateji tərəfdaş kimi çıxış etməsi xüsusi əhəmiyyət kəsb edir.

Bu barədə Serbiyanın mədən və energetika naziri Dubravka Djedoviç Handanoviç “Report”a müsahibəsində deyib.

Nazir bildirib ki, Azərbaycandan qaz tədarükü həcmləri üç il əvvəllə müqayisədə iki dəfə artaraq 2025-ci ildə gündəlik təxminən 2 milyon kubmetr təşkil edib.

Qeyd edib ki, SOCAR nümayəndələri ilə danışıqlar çərçivəsində ildə 900 milyon kubmetrə qədər qaz tədarükünün həyata keçirilməsi imkanı, Nişdəki qaz elektrik stansiyasının 2030-cu ildə istismara verilməsindən sonra isə həcmin 1,4 milyard kubmetrə qədər artırılması müzakirə olunub.