SOCAR Bakı Enerji Həftəsi çərçivəsində keçirilən tədbirlərdə fəal iştirak edir - Baku TV

SOCAR “Bakı Enerji Həftəsi” çərçivəsində təşkil olunan tədbirlərdə fəal iştirak edir.

SOCAR-ın “baş tərəfdaş”ı olduğu “Bakı Enerji Həftəsi” bu gün regionda və qlobal miqyasda enerji təhlükəsizliyinə, dayanıqlı tərəqqiyə, səmərəli əməkdaşlığa töhfə verən mühüm platforma kimi böyük nüfuz qazanıb.

SOCAR bu il “Beynəlxalq Xəzər Neft və Qaz Sərgisi”ndə “Etibarlı Tərəfdaş, Güvənli Enerji Təchizatı” ideyası əsasında hazırlanan stendlə təmsil olunur.

Ən son texnoloji həllər tətbiq olunmaqla hazırlanan stenddə SOCAR-ın ölkəmizin enerji təhlükəsizliyinin təmin edilməsində oynadığı rol, beynəlxalq fəaliyyət coğrafiyası, innovasiya və rəqəmsallaşma gündəliyi, eləcə də dayanıqlı inkişaf istiqamətində həyata keçirdiyi təşəbbüslər barədə məlumatlar yer alıb.

Ziyarətçilər stendin “İnnovasiya, rəqəmsallaşma və qlobal fəaliyyət” bölməsində şirkətin rəqəmsal transformasiya üzrə nailiyyətləri, beynəlxalq layihələri barədə məlumatlarla tanış ola bilərlər.

“Dayanıqlı gələcək və ətraf mühitin mühafizəsi” bölməsində isə Bakı Ali Neft Məktəbi, Xəzər Təlim və Sertifikatlaşdırma Mərkəzi, xarici universitetlərlə əməkdaşlıq, tədqiqat və inkişaf təşəbbüsləri, insan kapitalına yönəlmiş digər layihələr, həmçinin geotermal enerji, metan emissiyalarının azaldılması layihələri barədə informasiyalar təqdim olunur.