SOCAR COP29-da geotermal enerjinin inkişafı üzrə işlərin nəticələrini açıqlayacaq

“SOCAR COP29 zamanı geotermal enerjinin inkişafı istiqamətində görülən işlərin nəticələrini açıqlayacaq”.

Bunu SOCAR-ın vitse-prezidenti Əfqan İsayev Bakı İqlim Fəaliyyəti Həftəsi çərçivəsində keçirilən panel müzakirələrində deyib.

O qeyd edib ki, SOCAR yaşıl enerji sahəsində ixtisaslaşmış “Lightsource BP” şirkəti ilə birgə işləyir. Bu şirkətlə 240 MVt gücündə günəş elektrik stansiyasının tikintisi nəzərdə tutulur.

Xatırladaq ki, 21 sentyabr 2023-cü ildə SOCAR şirkəti və Azərbaycan İnvestisiya Şirkəti arasında Cəbrayıl rayonunda “Şəfəq” günəş elektrik stansiyası layihəsinə Qoşulma Sazişi imzalanıb, iyunun 3-də isə Energetika Nazirliyi və BP arasında layihənin qiymətləndirilməsi və həyata keçirilməsi sahəsində əməkdaşlığa dair İcra Müqaviləsi imzalanıb. Layihəyə investisiya qoyuluşu 200 milyon ABŞ dolları məbləğində qiymətləndirilir.