SOCAR-dan bu ixtisaslar üzrə təqaüd elanı | Qəbul üçün şərtlər nələrdir?

Azərbaycan Dövlət Neft Şirkətinin “Türkiyə Petrolları Anonim Ortaqlığı” şirkəti ilə əməkdaşlığı çərçivəsində Zonquldaq Bülənt Ecevit Universitetinin nəzdində fəaliyyət göstərən Çaycuma peşə məktəbinə dənizdə sudibi əməliyyatlarının texnologiyası və dənizdə qazma texnologiyası ixtisasları üzrə təqaüd proqramına qəbul elan edilib.

Qəbul olmuş şəxsin təhsil haqqı və aylıq 350 manat məbləğində təqaüd 2 illik peşə təhsili müddətində SOCAR tərəfindən ödəniləcək. Əlavə olaraq, təhsil müddətində ildə iki dəfə olmaqla Azərbaycandan Türkiyəyə və əks istiqamətə təyyarə bileti təmin olunacaq.

Proqrama müraciət etmək üçün namizədlər qeyd olunan tələblərə cavab verməlidirlər:

- Azərbaycan Respublikasının vətəndaşı olmalı;
- Tam orta təhsilli olmalı;
- Xarici dil bilikləri olmalıdır (türk dili C1 və ingilis dili B1 səviyyələri).

İmtahan nəticələrinə əsasən ehtiyac yaranarsa, ingilis dili ilə bağlı nəticələri tələblərə cavab verməyən şəxslər peşə məktəbində əlavə olaraq 1 illik hazırlıq müddətinə cəlb oluna bilərlər. Bu müddət ərzində də xərclər SOCAR tərəfindən qarşılanacaq.

Müsabiqə mərhələli olaraq keçiriləcək:

- Proqrama müraciət mərhələsi;
- Dil biliyinin yoxlanması mərhələsi;
- İngilis və türk dili biliyinin yoxlanması imtahanı;
- Proqrama seçim və qəbul mərhələsi.

Qeyd edək ki, müraciət qəbulunun son tarixi 2024-cü il 31 iyuldur.