SOCAR-ın Türkiyə ofisinə edilən hücumun məqsədi | Şirkətdən rəsmi açıqlama

Hazırda Azərbaycan Dövlət Neft Şirkətinin törəməsi olan “SOCAR Türkiyə” şirkətinin İsrailə xam neftin satışının həyata keçirilməsi ilə bağlı ittihamlar həqiqəti əks etdirmir və qəsdən ictimai rəyi çaşdırmaq məqsədi daşıyır.

Bu barədə “SOCAR Türkiyə”nin yaydığı məlumatda deyilir.

Bildirilir ki, “Socar Türkiyə” fəaliyyətini baş ofisi SOCAR-ın ortaya qoyduğu vizyona uyğun olaraq beynəlxalq biznes müqavilələri çərçivəsində həyata keçirir. Dünyada neft satışı bazarının özünəməxsus xüsusiyyətləri var və hasil edilən xam neftin ticarət və ya treydinq şirkətləri vasitəsilə satışı həyata keçirilir. Tədarükçü şirkətlər xam neftin hansı ölkələrə daşınmasına, hansı məqsədlər üçün istifadə edilməsinə nəzarət və müdaxilə imkanlarına malik deyillər.

Qeyd olunur ki, bu xüsusda SOCAR digər neft şirkətləri kimi tədarük etdiyi məhsulları aidiyyəti treydinq şirkətləri ilə satış əlaqələri çərçivəsində həyata keçirir.

“Bazarda fəaliyyət göstərən ticarət şirkətləri ilə davam edən mümkün satış əlaqələrimiz çərçivəsində ticarət şirkətlərinin SOCAR-dan tədarük etdiyi xam neftin hansı ölkələrə daşındığına və hansı məqsədlə istifadə edildiyinə tərəfimizdən nəzarət və müdaxilə edilməsi mümkün deyil”, – deyə məlumatda vurğulanıb.

Həmçinin qeyd edilib ki, son dövrlər regionda baş verən geosiyasi proseslər nəticəsində müəyyən etiraz aksiyalarında “SOCAR Türkiyə” və qrup şirkətləri bir müddətdir bəzi təxribatçı qruplar tərəfindən həm sosial media üzərindən, həm də həyata keçirilən fiziki aksiyalarla hədəf göstərilir. Bu təxribatçı qruplar şirkətin İsraillə xam neft üzrə ticarət əlaqəsi olduğuna dair əsassız ittihamlar irəli sürərək təxribat xarakterli paylaşımlar edir, şirkət binasına əməkdaşların təhlükəsizliyini riskə atacaq şəkildə fiziki hücumlar həyata keçirirlər.

“Socar Türkiyə”nin İstanbuldakı mərkəz binasında martın 12-si, mayın 29-u və 31-i, iyunun 2-də, Bursadakı Bursaqaz ofis binasında isə mayın 24-də həyata keçirilən və getdikcə şiddətlənən təxribatların davam etməsi şirkət əməkdaşlarının həyatı üçün təhlükə yaratmaqdadır.