SOCAR-ın uğurlu fəaliyyəti: Türkiyədəki istehsal gücü artırılacaq

Dövlət Neft Şirkətinin Türkiyədəki aktivi olan STAR neft emalı zavodunun illik istehsal gücünün 2024-cü ildə 13 milyon tona çatdırılması planlaşdırılır.

Bunu SOCAR-ın Türkiyədəki Neft emalı və neft-kimyası bölməsinin rəhbəri, “Petkim Petrokimya Holding”in baş direktoru vəzifəsini icra edən Kənan Mirzəyev bildirib.

Onun sözlərinə görə, yarandığı gündən STAR neft emalı zavodu optimallaşdırma imkanlarından istifadə etməklə, aşağı investisiya ilə əhəmiyyətli güc artımına nail olub.

“Neft emalı zavodunun gücü 10 milyon tondan 12 milyon tona çatdırılıb. Nəticədə həm “Petkim”, həm də STAR zavodu üçün mövcud bazar şərtlərinə və gözlənilən qlobal tendensiyalara uyğun olaraq müsbət perspektivimiz var”, – deyə Kənan Mirzəyev bildirib.

Onun sözlərinə görə, Türkiyənin emal olunmuş neft məhsulları istehsalının təxminən 25 %-ni təşkil edən və 19,5 % daxili bazar payına malik olan STAR 2022-ci ildə uğurlu rentabellik əldə edib.

“Bu dinamikanın 2023-cü ildə də davam edəcəyini deyə bilərik. Xüsusilə “Brent” və regiondakı digər neft markaları arasındakı qiymət fərqi bizə xammal baxımından müsbət təsir edib və EBITDA-nın planlaşdırılandan daha yaxşı olmasının əsas səbəbi olub. Bu uğurlu fəaliyyəti 2024-cü ildə də davam etdirməyi hədəfləyirik”, – deyə “Petkim Petrokimya Holding”in baş direktoru vəzifəsini icra edən Kənan Mirzəyev əlavə edib.