SOCAR Qazaxıstan neftinin tranzitinə başlayıb

Dövlət Neft Şirkəti Qazaxıstan neftinin “Bakı-Tbilisi-Ceyhan” boru kəməri ilə tranzitinə başlayıb. Bu barədə SOCAR-dan bildirilib.

“SOCAR Midstream Operations” Məhdud Məsuliyyətli Cəmiyyətinin məlumatına görə, “Tengiz” yatağından hasil edilən Qazaxıstan neftinin ilk partiyası martın 23-də “Prezident Heydər Əliyev” tankeri ilə Aktau limanından Azərbaycanın Səngəçal terminalına çatdırılıb. Qazaxıstan neftinin “Bakı-Tbilisi-Ceyhan”la nəqli SOCAR və “KazMunayQaz” şirkətləri arasında ildə 1,5 milyon ton neftin tranzitini nəzərdə tutan saziş çərçivəsində həyata keçirilir.

2023-cü ilin sonuna kimi Xəzər dənizi ilə ayda 12-14 tanker reysinin həyata keçirilməsi planlaşdırılır. SOCAR Qazaxıstan neftini “Bakı-Tbilisi-Ceyhan”a qəbul etmək üçün 2022-ci ildə Səngəçal terminalının ərazisində toplayıcı boru kəmərləri şəbəkəsinin yenilənməsi istiqamətində mühüm layihələr həyata keçirib. Bu layihələr “Bakı-Tbilisi-Ceyhan”ın ötürmə gücündən istifadə səviyyəsini artırıb.