SOCAR Somalidə axtarış-kəşfiyyat və treydinq istiqamətlərini araşdırır

SOCAR Somali ilə enerji sektorunun müxtəlif istiqamətlərində mümkün əməkdaşlığı araşdırır.

Dövlət Neft Şirkətindən verilən məlumata görə, bu məsələ SOCAR-ın prezidenti Rövşən Nəcəf və Somalinin neft və mineral sərvətlər naziri Dahir Shire Mohamed arasında görüşdə müzakirə olunub.

Danışıqlar zamanı bu il fevralın 12-də Azərbaycan Prezidenti İlham Əliyevlə Somali Prezidenti Hasan Şeyx Mahmud arasında keçirilən yüksəksəviyyəli görüşlərin ölkələrimiz arasında müxtəlif istiqamətlərdə, o cümlədən enerji sektorunda əməkdaşlıq üçün əlverişli zəmin yaratdığı xüsusi vurğulanıb.

Görüşdə Somalidə neft-qaz sahəsində insan kapitalının inkişafı məqsədilə somalili tələbələrin Bakı Ali Neft Məktəbində təhsil almaları, somalili mütəxəssislərin neft-qaz sahəsində bilik və təcrübələrinin artırılması üçün əməkdaşlıq imkanları nəzərdən keçirilib.

Görüşdə həmçinin enerji sektorunun müxtəlif istiqamətlərində, o cümlədən axtarış-kəşfiyyat və treydinq istiqamətlərində mümkün əməkdaşlığın araşdırılması və qarşılıqlı maraq doğuran digər məsələlər müzakirə olunub.