SOCAR və Almaniyanın SEFE şirkəti arasında 10 illik müqavilə imzalandı | Detallar

Azərbaycan Dövlət Neft Şirkəti ilə Almaniyanın “Securing Energy for Europe” dövlət enerji şirkəti arasında təbii qaz alışı üzrə 10 illik müqavilə imzalanıb. Bu barədə SOCAR məlumat yayıb.

Razılaşmaya əsasən, qaz həcmlərini SOCAR Avropada SEFE-yə təchiz edəcək. İllik tədarük həcmi mərhələli şəkildə artırılaraq, 15 terevatt-saat, yəni təxminən 1,5 milyard kubmetrə çatdırılacaq.

Bu əməkdaşlıq hasilat və infrastruktur, o cümlədən qaz kompressorları sahəsində investisiyaları dəstəkləməklə, Avropaya daha çox boru xətti qazının çatdırılmasını təmin edəcək və qitənin enerji təhlükəsizliyinə töhfə verəcək.

SEFE-nin baş icraçı direktoru Egbert Laege bildirib ki, bu uzunmüddətli müqavilə Almaniya ilə Azərbaycan arasında mövcud olan güclü münasibətlərin bariz nümunəsidir.

Bu tərəfdaşlıq sayəsində Avropaya əhəmiyyətli həcmdə təbii qaz çatdırmaq üçün yeni bir marşrut formalaşdırılır, bu isə bizim portfelimizi şaxələndirməyə və müştərilərimizin enerji təchizatının təhlükəsizliyini artırmağa xidmət edir.

SOCAR-ın prezidenti Rövşən Nəcəf isə SEFE-yə etibarlı və iri həcmdə təbii qaz təchiz etməklə Azərbaycanla Almaniya arasında mövcud tərəfdaşlığın daha da möhkəmləndiyini, ölkəmizin Avropanın enerji şaxələndirməsi və dayanıqlı inkişaf hədəflərinə töhfə verdiyini vurğulayıb.