Vyetnamdakı konfransda əsas mövzu | Pərviz Şahbazov forumda çıxış etdi

Hanoyda Azərbaycan-Vyetnam birinci biznes şurası və biznes-forumu keçirilib.

Forumun açılışında Vyetnam Sosialist Respublikasının sənaye və ticarət nazirinin müavini Nquyen Hoanq Lonq Azərbaycanın Qafgaz regionunda Vyetnamın ilk strateji tərəfdaşı olduğunu bildirib.

Onun sözlərinə görə, bu da ölkələrimiz arasında dərin siyasi etimadı və əməkdaşlıq üçün geniş potensialı əks etdirir.

Azərbaycanın energetika naziri Pərviz Şahbazov isə çıxışında diqqəti ölkə iqtisadiyyatının şaxələndirmə mərhələsinə qədəm qoymasına yönəldərək xarici investorlar üçün rəqabətədavamlı və sabit mühit formalaşdırıldığını vurğulayıb:

“Vyetnam şirkətləri üçün Azərbaycan yalnız 10 milyonluq daxili bazar deyil, həmçinin Qafqaz, Mərkəzi Asiya və Avropa regionlarına çıxış üçün strateji qapıdır. Eyni zamanda Azərbaycan şirkətləri üçün Vyetnam sürətlə inkişaf edən, innovasiyalara açıq və strateji əhəmiyyət kəsb edən Asiya bazarıdır.

Sahibkarları Azərbaycan və Vyetnamda investisiya mühiti, iqtisadi zonalar, sənaye parkları, yüksək texnologiyalar, kənd təsərrüfatı, karbohidrogenlər və bərpa olunan enerji sahələrində informasiya mübadiləsinə qoşulmağa, qarşılıqlı biznes missiyaları təşkil etməyə, mövcud imkanlardan faydalanmağa, birgə müəssisələr yaratmağa və konkret layihələrə sərmayə yatırmağa dəvət edirik”.

Biznes şurası və forum İxracın və İnvestisiyaların Təşviqi Agentliyi, Azərbaycan Kiçik və Orta Biznesin İnkişafı Agentliyi, Vyetnam Milli Sahibkarlıq Assosiasiyası və hər iki ölkənin şirkətlərinin iştirakı ilə panel müzakirələri və işgüzar görüşlərlə davam edib.