Bakıda qadın sığınacaq mərkəzi təhdid edildi | DİN-dən təcili açıqlama

“Təmiz dünya” Qadınlara Yardım İctimai Birliyi vətəndaş tərəfindən təhdid olunub.

Bununla bağlı Birliyin rəsmi “Facebook” səhifəsində paylaşım edilib.

Məlumatda bildirilib ki, sığınacaqda dörd gün qalıb çıxmış qadının keçmiş əri sığınacağı yandıracağı, partladacağı, onlara faciə yaşadacağı ilə bağlı təhdid dolu mesaj göndərib.

Qeyd edilib ki, təhdid mesajlarını yazan şəxs qadından rəsmi olaraq ayrılıb və bir müddət əvvəl öz keçmiş qaynına da kafel parçası ilə xəsarət yetirib.

Məsələ ilə bağlı Daxili İşlər Nazirliyindən bildirilib ki, müvafiq polis orqanında araşdırma aparılır. Şəxs barəsində qanunamüvafiq tədbirlərin görüləcəyi vurğulanıb.