İpoteka krediti əldə etmək istəyənlər bunları bilsin

Azərbaycanda 2025-ci il üzrə adi və güzəştli ipoteka kreditlərinin verilməsinə başlanılır.

Artıq İpoteka və Kredit Zəmanət Fondu müvəkkil banklara ipoteka kreditlərinin, o cümlədən güzəştli ipoteka kreditlərinin verilməsi üçün limitlər ayırıb.

Fonddan bildirilib ki, vətəndaşlardan adi ipoteka kreditləri üzrə müraciətlərin qəbuluna 2025-ci ilin fevralın 6-sı saat 10:00-dan başlanacaq.

Güzəştli ipoteka kreditləri üzrə müraciətlərə bir gün sonra – fevralın 7-si saat 10:00-dan etibarən start veriləcək. Müraciətlərin qəbulu “Elektron ipoteka və kredit zəmanət” sistemi üzərindən SİMA və ya “Asan İmza” vasitəsilə həyata keçiriləcək.

Qeyd olunub ki, elektron sistemdə aparılan təhlükəsizlik tədbirləri ilə əlaqədar elektron müraciətlər kompüter və ya notbuk vasitəsilə edilməlidir.