Kibertəhlükəsizlik komandalarının final seçimi keçirilib - Baku TV

Azərbaycanı “WorldSkills Shanghai 2026” beynəlxalq yarışında kibertəhlükəsizlik istiqaməti üzrə təmsil edəcək komandanın seçimi üçün final mərhələsi yekunlaşıb.

22-27 sentyabr 2026-cı ildə Çinin Şanxay şəhərində keçiriləcək platformada 89 ölkədən minlərlə iştirakçı və ekspert bir araya gələcək. Seçim və hazırlıq prosesi İnnovasiya və Rəqəmsal İnkişaf Agentliyi (İRİA), Peşə Təhsili üzrə Dövlət Agentliyi və “WorldSkills Azərbaycan”ın birgə əməkdaşlığı ilə həyata keçirilir.

İRİA-nın nəzdində fəaliyyət göstərən Azərbaycan Kibertəhlükəsizlik Mərkəzində təşkil olunan mərhələyə əvvəlki turda ən yüksək nəticə göstərən 30 iştirakçı vəsiqə qazanıb. Onların bilik və bacarıqları iki genişmiqyaslı CTF – “Capture the Flag” yarışı üzərindən yoxlanılıb. Proses Mərkəzin ekspert heyəti tərəfindən idarə edilib.

Tapşırıqlar iştirakçıların texniki səviyyəsini, stres altında qərar vermələrini və praktiki performanslarını ölçməyə hesablanıb. Nəticələrə əsasən, ən yüksək göstəriciyə malik 10 nəfərə qədər iştirakçı yekun intensiv təlim proqramına cəlb olunacaq.

Seçim mexanizmi ölkədə kibertəhlükəsizlik üzrə peşəkar kadr bazasının genişlənməsinə, milli potensialın beynəlxalq standartlara uyğunlaşmasına və Azərbaycanın qlobal peşəkar platformalarda daha güclü təmsil olunmasına xidmət edir.