Naxçıvanın su hövzələrinə mediatur təşkil edilib | Yeni layihələr barədə açıqlama

Naxçıvan Su Meliorasiya Sistemlərinin İstismarı İdarəsi tərəfindən qlobal su çatışmazlığına, sudan səmərəli və qənaətli istifadənin vacibliyinə ictimai diqqəti artırmaq üçün muxtar respublikanın su hövzələrinə mediatur təşkil olunub.

Mediatur çərçivəsində jurnalistlər əvvəlcə Şahbuz rayonunun ərazisində, dəniz səviyyəsindən 2424 metr yüksəklikdə yerləşən “Qanlıgöl” sututarına baş çəkiblər.

Naxçıvan Su Meliorasiya Sistemlərinin İstismarı İdarəsinin rəisi Malik Rzayev jurnalistlərə açıqlamasında deyib ki, uzun müddət “Qanlıgöl” sututarının suburaxıcı qülləsində təmir-bərpa işlərinin aparılmaması həmin qüllənin müəyyən hissəsinin yararsız hala düşməsinə səbəb olub:

“Bu da müəyyən ərazilərin su təminatında böyük problemlərə yol açıb. “Qanlıgöl” sututarında təmir-bərpa işlərindən sonra ümumilikdə 850 min kubmetr tutumu olan sututarının artıq 830 min kubmetri, yəni təqribən 97 faizi dolub, bu da bölgə üçün mühüm əhəmiyyət kəsb edir”.