Nişanına günlər qalmış öldürülən Vüsalın ailəsi fəğan etdi | Xəncər boyda bıçaqla... - ARZUNUN VAXTI

Baku TV-də yayımlanan “Arzunun vaxtı” verilişinin yeni buraxılışında 27 yaşında qətlə yetirilən Vüsalın ailəsinin yaşadığı ağır faciədən bəhs olunub.

Avtomobil ustası işləyən Vüsal hadisə baş verən gün işdən evə qayıdırmış. Ailəsinin sözlərinə görə, küçədə bir qrup gənclə aralarında yaranan qısa mübahisədən sonra həmin şəxslər geri qayıdaraq ona bıçaqla çoxsaylı zərbələr endiriblər. Ağır yaralanan gəncin həyatını xilas etmək mümkün olmayıb.

Vüsalın anası oğlunun zəhmətkeş, ətrafında hörmət qazanan və peşəsini sevən bir gənc olduğunu bildirib:

“Mənim balamın əlləri mazut içində idi. İşindən evə gəlirdi. Çox peşəkar avtomobil ustası idi”. O, oğlunun nişan mərasiminə hazırlaşdıqlarını, lakin toy üçün alınan xonça və şamların məzar üstünə aparıldığını göz yaşları ilə danışıb: “Ən böyük arzumuz onu evləndirmək idi. Onun da arzusu ailə qurmaq, övlad sahibi olmaq idi”.