Qobustanda yol problemi | Dağ kəndləri istiqamətində avtomobil yolları buz bağlayıb - Baku TV

Qobustan rayonunda güclü qar yağışı dağ kəndlərinə gedən yollarda hərəkəti çətinləşdirib.

Səhər saatlarından etibarən xüsusilə Sündü–Xilmilli avtomobil yolu istiqamətində, yolun 7 və 12-ci kilometrliyində buzlaşma müşahidə olunur.

Mövcud vəziyyət bəzi sürücülər üçün çətinlik yaradıb.

“Yol qarlı, buzludur. Gedib-gəlmək çox çətindir. Sürücülər ehtiyatlı olsunlar”, – deyə sürücülərdən biri qeyd edib.

Məsələ ilə bağlı 7 saylı Yol İstismar İdarəsinin sahə rəisi Novruz Novruzov bildirib ki, hazırda yollarda yaranan çətinliklərin aradan qaldırılması üçün tədbirlər görülür. Onun sözlərinə görə, əraziyə ağır texnika və canlı qüvvə cəlb olunub, yol örtüyünə qum-duz qarışığı səpilir.