"25 il həbsdə qalmaq olar?!" | Musiqiçi niyə dəniz kənarında daxmada yaşayır? - ARZUNUN VAXTI

“Arzunun vaxtı” verilişinin budəfəki qonağı Pirallahı sakini Mehman Dərviş olub.

O, ömür yolundan, keçmiş səhvlərindən və həbsxana həyatından danışıb. Mehman Dərviş bildirib ki, gənclik illərində atasının sözünə baxmayıb və təhsil almayıb:

“Zindanda olduğum vaxtlarda çoxlu kitab oxudum, çünki vaxtım bol idi. Yalnız bir şeyə peşmanam: atasının sözünə qulaq asmayan övlad idim. Ən böyük peşmanlığım budur”.

Ümumilikdə 25 il həbsxana həyatı yaşadığını bildirən Pirallahı sakini zindandan çıxdıqdan sonra atasını görə bildiyini qeyd edib:

“2017-ci ilin avqustunda azadlığa çıxdım və 92 yaşlı atamı görüb halallığını ala bildim. Ondan sonra dünyasını dəyişdi”.

Gənclərə tövsiyə verən M.Dərviş ata-ana sözünə baxmağı vacib sayıb:

“Valideynlərinizin sözünə qulaq asın. Onlar sizdən çox görüb, çox bilirlər. Valideynin sözündən çıxmayın, çünki həqiqi xoşbəxtlik elə bundan başlayır”.