"Gənc səhv etməlidir" | Ailə insanın tərbiyəsinə qarışmamalıdır? - AMİN

“Amin” verilişində bu dəfə Xalq artisti Vidadi Həsənov və ilahiyyatçı Elvüsal Məmmədovla dürüstlük mövzusu müzakirə edilib.

Elvüsal Məmmədovun sözlərinə görə, dürüstlük hər şeydən əvvəl mənəvi dəyərlərin tərbiyə olunması ilə bağlıdır:

“Biz uşaqlarımıza kiçik yaşlarından bu mənəvi dəyərləri – dürüst, etibarlı, fədakar olmağı, sözünün üstündə durmağı öyrətməliyik. Biz ibadətlə mənəvi kimlik anlayışını fərqləndirməyi bacarmalıyıq.

Elə insanlar var ki, Allaha qarşı dürüstdürlər, yəni namaz qılırlar, oruc tuturlar, zəkat verirlər. Amma insanlara qarşı dürüst deyillər. Allah belə insanları zalım adlandırır. Deməli, biz övladlarımıza kiçik yaşlarından insanlara qarşı dürüst davranmağı öyrətdiyimiz kimi, Allaha qarşı da dürüst olmağı öyrətməliyik. Bu zaman bizim istədiyimiz mömin, inanclı insan modeli ortaya çıxır”.

Xalq artisti Vidadi Həsənov isə hesab edir ki, dürüstlüyün konkret düsturu yoxdur:

“Biz heç nədən sığortalı deyilik. Kim mənim yanımda “mən dürüst adamam, mən hər şeyi düz danışıram” desə, ona inanmaram. Çünki dini kitabımızda da deyilir ki, elə yalan var ki, min həqiqətdən yaxşıdır. Əgər bir həqiqət insanı məhv edəcəksə, o dürüstlük mənim nəyimə lazımdır, kimə lazımdır?!”.