Sabirabad heyvan satışı bazarı yenidən alıcı və satıcıların xidmətindədir - Baku TV

Sabirabad rayonunda yerləşən heyvan satışı bazarı fəaliyyətini bərpa edib.

Azərbaycan Qida Təhlükəsizliyi Agentliyinin (AQTA) həyata keçirdiyi qiymətləndirmənin nəticələrinə əsasən bazar biotəhlükəsizlik, baytarlıq və sanitariya tələblərinə uyğun şəkildə yenidən qurularaq istifadəyə verilib.

AQTA-nın şöbə müdiri Rəşad Abbasov bildirib ki, qiymətləndirmə zamanı müəyyən edilmiş tələblərə uyğun olaraq bazarın infrastrukturu tam yenilənib.

“Bazarın ərazisinə asfalt-beton örtüyü salınıb, heyvanların rahat və təhlükəsiz hərəkəti üçün rampalar və çardaqlar quraşdırılıb, baytarlıq nəzarətinin həyata keçirilməsi məqsədilə xüsusi məntəqə tikilib. Baytarlıq yoxlamaları zamanı xəstəlik əlamətləri aşkar edilən heyvanların digər heyvanlardan təcrid olunması üçün izolyatorlar yaradılıb. Heyvanların su və yem təminatı yaxşılaşdırılıb.

Bundan əlavə, identifikasiya sisteminin tətbiqi sayəsində heyvanların təsərrüfatdan təsərrüfata, eləcə də təsərrüfatdan kəsimxanaya qədər izlənməsi üçün zəruri şərait yaradılıb”, – deyə Rəşad Abbasov vurğulayıb.