Xəstəni komaya salıb, iflic edən həkimlərə hökm oxundu | Məhkəmə hansı qərarı verdi? - Baku TV

Lor-estetik cərrah Yaqub Əsədi və anestezioloq Cəmilə Əliyevanın həyata keçirdiyi əməliyyat zamanı xəstənin komaya düşməsi ilə bağlı cinayət işi üzrə məhkəmə prosesi başa çatıb.

Hökmə əsasən, 2 il müddətinə həkim fəaliyyəti ilə məşğul olmaq hüququndan məhrum edilməklə hər iki şəxsə 3 il müddətinə azadlıqdan məhrum etmə cəzası təyin edilib.

Məhkəmə prosesində tərəflər məsuliyyət məsələsində bir-birini ittiham edib. Cəmilə Əliyeva və onun vəkili bildiriblər ki, anesteziya və intubasiyanı Yaqub Əsədi həyata keçirib və onun etirazlarına məhəl qoymayıb. Yaqub Əsədinin müdafiə tərəfi isə xəstənin nəzarətsiz qalmasına görə məsuliyyətin anestezioloqun üzərinə düşdüyünü iddia edib.

Məhkəmə zərərçəkənin mülki iddiasını qismən təmin edib. Daha əvvəl ödənilən məbləğlər nəzərə alınmaqla Yaqub Əsədidən 14 min manat, Cəmilə Əliyevadan isə 61 min manat olmaqla, ümumilikdə 75 min manat təzminatın ödənilməsinə qərar verilib.