Avropada indiyədək aşkar edilmiş ən qədim ocaq izləri tapılıb

İngiltərənin Saffolk qraflığında aparılan arxeoloji qazıntılar zamanı Avropada indiyədək aşkar olunan ən qədim ocaq izləri üzə çıxarılıb.

Bu barədə Böyük Britaniya Muzeyinin mətbuat xidməti məlumat verib.

Alimlərin məlumatına görə, ocaq təxminən 400 min il əvvəl, Britaniyanın ilk sakinləri olan erkən neandertallar tərəfindən yandırılıb.

Professor Kris Stinger qeyd edib ki, tapıntılar Kent bölgəsində eyni dövrə aid ocaq izləri və o dövrdə yaşamış neandertallara aid fosillərlə üst-üstə düşür.

Ocaq izləri Barneym kəndi yaxınlığındakı gil karxanasında aparılan qazıntılar zamanı aşkarlanıb. Tədqiqatçılar həmçinin qədim əmək alətlərinin qalıqları və ocaq yandırmaq üçün istifadə edilən pirit parçaları tapıblar.