Böyük Britaniyada 82 illik rekord qırıldı

Avropanın bir çox ölkəsində may ayı üçün rekord temperatur göstəriciləri qeydə alınıb. İsti hava dalğasının ayın sonuna qədər davam edəcəyi bildirilir.

Böyük Britaniyada temperatur rekord həddə yüksəlib. Paytaxt Londonda havanın temperaturu 30 dərəcəni keçib.

Böyük Britaniya Meteorologiya İdarəsi bəzi bölgələrdə temperaturun 35 dərəcəyə çata biləcəyini və bunun son 82 il ərzində ölkə tarixində qeydə alınan ən isti may günlərindən biri ola biləcəyini açıqlayıb.

Güclü istilər səbəbindən bəzi tədbirlər ləğv olunub, eyni zamanda, bir sıra bölgələrdə su təchizatı problemləri yaranıb.

Fransa Meteorologiya Xidməti ölkənin bir çox şəhərində may ayı üçün rekord istilərin müşahidə edildiyini açıqlayıb. Paytaxt Parisdə temperaturun yaxın günlərdə 30 dərəcədən yuxarı qalacağı gözlənilir.

İspaniyada isə meteoroloqlar bəzi bölgələrdə temperaturun 40 dərəcəyə qədər yüksələcəyini bildirirlər. Xüsusilə Badaxos şəhərində rekord istilər proqnozlaşdırılır.

İspaniya Dövlət Meteorologiya Agentliyi isə ölkənin bəzi bölgələrində qısamüddətli, lakin güclü yağışların da yağacağını istisna etməyib.