İranla toqquşma ABŞ-yə nə qədər baha başa gələ bilər? | Generaldan xəbərdarlıq - Baku TV

“İrana qarşı hərbi əməliyyatlar Vaşinqton üçün uzunmüddətli münaqişəyə səbəb ola bilər”.

"Axios"un mənbələrə istinadən verdiyi xəbərə görə, bunu ABŞ Silahlı Qüvvələrinin Birləşmiş Qərargah Rəisləri Komitəsinin sədri, general Den Keyn bildirib.

Keyn ABŞ Prezidenti Donald Tramp və yüksəkvəzifəli administrasiya rəsmiləri ilə söhbətlərində xəbərdarlıq edib ki, İrana qarşı hərbi kampaniya əhəmiyyətli risklər daşıyır və xüsusən uzunmüddətli münaqişəyə səbəb ola bilər.

Mənbə qeyd edir ki, Amerika liderinin yaxın çevrəsindəki bəzi şəxslər ehtiyatlı olmağa çağırılırlar. Eyni zamanda "Axios"un bəzi mənbələri Trampın özünün zərbəyə meylli olduğunu iddia edir.

Məlumata görə, Keyn ABŞ-nin Venesueladakı hərbi əməliyyatını tam dəstəkləyib, lakin İranla bağlı müzakirələrdə çox ehtiyatlıdır. Bununla yanaşı, o, həmçinin hesab edir ki, İrana qarşı güc tətbiqi ABŞ qoşunları arasında daha çox itkiyə səbəb olacaq.

Vitse-prezident Cey Di Vens də son günlər ABŞ-nin uzunmüddətli münaqişəyə cəlb olunma potensialı ilə bağlı narahatlığını bildirib.

Bu arada, 4500 nəfərlik heyətə malik Amerikanın "USS Gerald R. Ford" aviadaşıyıcısı Yunanıstanın Krit adasındakı Suda Körfəzindəki ABŞ bazasına çatıb və fevralın 27-nə qədər orada qalacaq.