Netanyahu Suriyaya son xəbərdarlığını etdi | İsrail ordusu hərəkətə keçdi - Baku TV

İsrail Suriyadakı aerodroma zərbə endirməzdən əvvəl Dəməşqi xəbərdar edib və Amerika Birləşmiş Ştatları ilə kəşfiyyat məlumatlarını paylaşıb.

Bu barədə İsrailin müdafiə naziri İsrael Kats bildirib.

Ordu rəhbərliyi Türkiyənin İsrailin təhlükəsizliyini təhdid edə biləcək hərəkətləri ilə bağlı alınan kəşfiyyat məlumatlarını nəzərə alaraq Suriyadakı “Əbu əl-Duhur” aerodromuna zərbə endirməyi bir neçə dəfə tövsiyə edib.

“Hərbçilərlə bir neçə görüşdən sonra İsrailin Baş naziri Benyamin Netanyahu “Əbu əl-Duhur”a zərbə endirməmək üçün ən yüksək səviyyədə Suriya hökumətinə birbaşa xəbərdarlıq edib. İsrailin xəbərdarlığı cavabsız qaldıqdan sonra Netanyahu orduya zərbə endirmək üçün icazə verib. Zərbə uğurla həyata keçirilib”, – deyə nazir qeyd edib.

Kats əlavə edib ki, kəşfiyyat məlumatları ABŞ-nin müvafiq orqanlarına ötürülüb.

Daha əvvəl Netanyahunun ofisi Suriyanın Türkiyə qoşunlarının ölkənin şimalındakı aviabazada yerləşdirilməsinə icazə verməklə İsraillə təhlükəsizlik status-kvosunu pozmağa yaxın olduğunu bildirib.