Pusanda kanalda qalan “Bukangi” adlı köpəkbalığı hələ də xilas edilməyib

Cənubi Koreyanın Pusan liman şəhərində kanalda ilişib qalan köpəkbalığını açıq dənizə qaytarmaq üçün ikinci cəhd də uğursuz olub. Nəticədə dəniz canlısı hələ də kanalda qalmaqda davam edir.

Xilasedicilər köpəkbalığını tora salaraq kanaldan çıxarmağa çalışıblar. Lakin iki saat davam edən təqibdən sonra torun qayalara ilişməsi təhlükəsi yarandığı üçün əməliyyatı dayandırmalı olublar.

İndi mütəxəssislər ümid edirlər ki, köpəkbalığı özü açıq dənizə qayıdacaq. Bunun üçün heyvanın kanalın daha uzaq hissələrinə üzməsinin qarşısını almaq məqsədilə tor suya atılıb.

Uzunluğu 3,5 metr olan köpəkbalığı ilk dəfə sentyabrın 18-də Şimal limanındakı dar su kanalında aşkarlanıb. Şimal limanının koreyaca adından götürülən “Bukangi” ləqəbi verilən köpəkbalığını görmək üçün əraziyə indiyədək təxminən 600 min insan gəlib.

Mütəxəssislər hesab edirlər ki, bu, əsasən mülayim və isti sularda yaşayan və Cənubi Koreya sahillərində də müşahidə olunan bürünc köpəkbalığı ola bilər.