Rusiya nüvə arsenalını artırır? - Peskovdan sensasiya yaradan açıqlama

“Rusiyanın nüvə doktrinasında dəyişiklik Qərbə siqnaldır”.

Bunu Kremlin sözçüsü Dmitri Peskov bildirib.

“Bu, bizə dost olmayan ölkələrə Rusiyaya müxtəlif vasitələrlə hücumda iştirak edəcəkləri təqdirdə bir növ xəbərdarlıqdır”, – deyən D.Peskov qeyd edib ki, bütün dünyaya Rusiyanın nüvə potensialı yaxşı məlumdur və sağlam düşünən Qərb siyasətçiləri Prezident Vladimir Putinin bəyanatlarının ciddiliyini başa düşürlər.

D.Peskov həmçinin qeyd edib ki, Rusiya nüvə arsenalını artırmağı planlaşdırmır. O, sentyabrın 25-də Təhlükəsizlik Şurasında bu barədə heç bir söhbətin getmədiyini söyləyib.

Vladimir Putinin sözçüsü yenilənmiş nüvə doktrinasının mətninin dərci ilə bağlı qərar qəbul edilərsə, Kremlin vaxtında məlumat verəcəyini də vurğulayıb.