Türkiyədə böyük qalmaqal | Daha hansı məşhurların başı bəlaya girdi?

Türkiyədə menecerlik şirkətlərinə qarşı başladılan istintaq fərqli yön alaraq daha da genişlənib.

İstanbul Baş Prokurorluğu tərəfindən aparılan “Gəzi” istintaqı çərçivəsində məşhur aktyorlar Halit Ergenç və Dolunay Soysert ifadə verməyə çağırılıb.

İstintaq tanınmış menecer Ayşe Barımın “Gəzi Müqavimətinin təşkilatçılarından biri” olduğu iddiaları əsasında başladılıb.

Yanvarın 10-da Barım barəsində araşdırmalara start verilib və yanvarın 13-də onun ölkədən çıxışına qadağa qoyulub.

İstintaq çərçivəsində aktyorlar Serenay Sarıkaya, Deniz İşin və Nedim Şaban artıq ifadə verib. Son olaraq, Barımla əlaqəsi olduğu iddia edilən Halit Ergenç və Dolunay Soysert də ifadəyə çağırılanlar siyahısına əlavə olunub.

İstanbul Respublika Prokurorluğu istintaqın yazılı və vizual mediada yer alan iddialar əsasında aparıldığını bildirib.

Hazırda araşdırmalar davam edir.