Bakıdakı ağır qəzanın anbaan görüntüsü | Piyada son anda xilas oldu, amma...

Paytaxtın Xəzər rayonu, Qala-Pirallahı yolunda piyada məsuliyyətsizliyi nəticəsində baş verən qəzanın görüntüləri yayılıb.

Hadisə zamanı yolun hərəkət hissəsindən keçən piyada qəzadan son anda xilas olub.

Bu barədə Daxili İşlər Nazirliyinin Nəqliyyatı İntellektual İdarəetmə Mərkəzi məlumat yayıb.

Qeyd olunub ki, qəza sürücülərdən birinin xəsarət alması, minik avtomobillərinə, yol infrastrukturuna zərər vurulması və yolda nəqliyyat sıxlığının yaranması ilə nəticələnib.

Qurumdan bildirilib ki, sürücü və piyadalar yollarda diqqətli olmalı, qəza şəraiti yaratmamalıdırlar.

Həmçinin vurğulanıb ki, piyada səki, piyada zolağı, yol çiyinləri ilə, bunlar olmadıqda isə velosipedçilərin hərəkətini çətinləşdirməmək şərti ilə velosiped yolu ilə hərəkət etməli və ya ayırıcı zolağı olan yollarda hərəkət hissəsinin xarici kənarı ilə getməlidir.

Sürücülər isə yol hərəkəti şəraitini nəzərə almaqla, nəqliyyat vasitəsini müəyyən edilən məhdudiyyətdən artıq olmayan sürətlə idarə etməlidirlər.