Tovuzda 60 yaşlı kişi niyə döyüldü? | Kənd sakinləri arasında mübahisə dava ilə bitdi

Tovuz sakini döyülərək xəstəxanalıq olub. Rayonun Aşağı Quşçu kənd sakini Etibar Qasımov həmkəndliləri tərəfindən döyüldüyünü iddia edir.

Zərərçəkənin sözlərinə görə, onun icarəyə götürdüyü sahədə başqa şəxslər icazəsiz heyvan otarıblar. Əraziyə gələn Etibar Qasımov çobandan heyvanların kimə məxsus olduğunu soruşub. Bundan sonra tərəflər arasında mübahisə yaranıb.

60 yaşlı Etibar Qasımov deyir ki, o, bir neçə şəxs tərəfindən döyülüb. Nəticədə xəstəxanalıq olub.

Zərərçəkən həmçinin iddia edir ki, o, döyüldükdən sonra ərazidən heyvan oğurluğunda ittiham edilib. Onu polisə verəcəkləri ilə də hədələyiblər.

TƏBİB-dən bildirilib ki, şəxsə zəruri tibbi xidmətlər göstərilib. Ona bədənin müxtəlif nahiyələrinin çoxsaylı travması diaqnozu təyin edilib.

İddialarda adı çəkilən Samir Məmmədov isə bildirib ki, sözügedən yonca sahəsi Etibar Qasımova məxsus deyil. Onun sözlərinə görə, səsləndirilən iddialar əsassızdır və buna dair əlində sübutları da var.

Samir Məmmədov həmçinin məsələ ilə bağlı hüquq-mühafizə orqanlarını məlumatlandırdığını əlavə edib.

Faktla bağlı Tovuz Rayon Polis Şöbəsindən bildirilib ki, məsələ ilə əlaqədar müvafiq ekspertiza təyin olunub, araşdırma aparılır. Ekspertizanın rəyindən və araşdırmanın nəticəsindən asılı olaraq məsələyə hüquqi qiymət veriləcək.