Tükürpərdən cinayəti törətməkdə ittiham olunanlar hakim qarşısında - Baku TV

Bakıda birlikdə kirayədə qaldıqları şəxsi yatarkən qətlə yetirdikdən sonra cinayəti gizlətmək məqsədilə meyiti hissələrə ayırmaqda təqsirləndirilən Fazil Feyzullayev və Ülvi Abbasovun cinayət işi üzrə məhkəmənin baxış iclası keçirilib.

Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən prosesdə prokuror təqsirləndirilənlərə ittiham aktını elan edib.

Hakim Fazil Feyzullayevin və Ülvi Abbasovun 15 ildən 20 ilədək və yaxud ömürlük azadlıqdan məhrum oluna biləcəklərini onlara xatırladıb.

Fazil Feyzullayev ittihamla özünü qismən təqsirli bilsə də, Ülvi Abbasov ümumiyyətlə özünü qətldə təqsirli bilməyib.

Yanvarın 4-də keçirilməsi nəzərdə tutulan növbəti prosesdə ittiham olunan hər iki şəxsin məhkəmədə sərbəst ifadələri gözlənilir.