AKF-dən Rafael Ağayevin istefa verməsi ilə bağlı açıqlama

Azərbaycan Karate Federasiyası idmanımızın fəxri, dəfələrlə dünya və Avropa çempionu Rafael Ağayevin qurumun vitse-prezidenti postundan istefa verməsi ilə bağlı xəbərlərə münasibət bildirib.

Federasiya məsələ ilə əlaqədar vitse-prezident Füzuli Musayevin açıqlamasını yayıb.

Bildirilib ki, hazırda ölkəmizdə karate idman növü üzrə akkreditasiyadan keçən tək qurum Azərbaycan Karate Federasiyasıdır. Rafael Ağayev Karate Federasiyasının deyil, "Azərbaycan Milli Karate Federasiyası" İctimai Birliyinin vitse-prezidentidir. Bu İctimai Birliyin prezidenti isə Yaşar Bəşirovdur.

AKF-nin açıqlamasında Rafael Ağayevin qurumun tədbirlərinə dəvət edildiyi vurğulanıb. "Azərbaycan Milli Karate Federasiyası" İctimai Birliyinin rəhbəri Yaşar Bəşirovun Rafael Ağayevi iclaslara çağırmasına isə AKF müdaxilə edə bilməz.

Qeyd edək ki, karatenin “Qara brilyantı” ləqəbli Rafael Ağayev 5 qat dünya və 11 qat Avropa çempionudur. Tokio-2020 Olimpiadasının gümüş mükafatçısı olan titullu idmançı həm də “Karate Combat” təşkilatının çempionudur.