Kərim Benzema karyerasını Türkiyədə davam etdirəcək?

Səudiyyə Ərəbistanında özünü xoşbəxt hiss etməyən Kərim Benzema karyerasını Türkiyədə davam etdirə bilər.

Mətbuatda yayılan məlumata görə, ulduz futbolçu “Qalatasaray”ın yeni transfer hədəfidir.

Bildirilir ki, “cim-bom” Benzemanın Səudiyyə Ərəbistanı çempionatında çıxış etməmək qərarından istifadə etmək niyyətindədir.

“Sarı-qırmızılar” fransalı hücumçunu mövsümün sonunadək icarə əsasında heyətə qatmağı planlaşdırır. Lakin Benzemanın potensial keçidə necə yanaşdığı hələ ki məlum deyil.

Qeyd edək ki, ötən ilin yayında “Real Madrid”dən ayrılaraq “Əl-İttihad”a qoşulan Kərim Benzema 20 görüşdə 12 qolla yadda qalıb. Səudiyyə kollektivi ilə müqaviləsi 2026-cı ilə qədər olan forvard hər mövsüm üçün 100 milyon avro qazansa da, buradakı şəraitindən narazıdır və komandadan getməyi düşünür.