Lionel Messi yeni klubunun adını açıqladı

Dünya futbolunun əfsanəsi, PSJ-dən ayrılan Lionel Messi karyerasını ABŞ-də davam etdirəcək.

Gələcək planları ilə bağlı müsahibə verən 35 yaşlı forvard Devid Bekhemin sahibi olduğu “İnter Mayami”yə qoşulacağını bildirib.

“Mayamiyə getməyə qərar verdim. Sövdələşmənin 100% bağlanıb-bağlanmadığına hələ ki tam əmin deyiləm. Amma ora yollanmağı planlaşdırıram”, – deyə L.Messi bildirib.

Forvard bu qərarını diqqət mərkəzində olmamaq və ailəsinə daha çox vaxt ayırmaq istəyi ilə izah edib. O həmçinin əlavə edib ki, bu addımı daha çox pul qazanmaq niyyəti ilə atmır.

Qeyd edək ki, mediada yayılan məlumata əsasən, Leo “İnter Mayami” ilə 3 illik müqavilə imzalayacaq. Onun məvacibi isə 150 milyon avro olacaq. Bundan başqa, L.Messi karyerasını bitirdikdən sonra MLS-də klub səhmdarı olmaq imkanına sahib olacaq.