Pauerliftinqçimiz Zaur Cəfərovdan tarixi nailiyyət

Azərbaycanlı pauerliftinqçi, əməkdar və beynəlxalq dərəcəli idman ustası, dəfələrlə dünya və Avropa çempionu olmuş Zaur Cəfərov növbəti nailiyyətə imza atıb.

O, Moskvada təşkil olunan dünya kubokunda 110 kq çəki dərəcəsində çıxış edib. “Benç press” hərəkətində mübarizə aparan Z.Cəfərov 262,5 kq nəticə ilə bütün rəqiblərini qabaqlayaraq 6-cı dəfə dünya çempionu olub. Bununla da, o, Azərbaycanın pauerliftinq tarixində ilk dəfə ən yüksək dərəcə tələbini yerinə yetirərək “elitar idmançı” tituluna yiyələnib.

Qeyd edək ki, yığmamızın digər üzvləri Şəmsi Bayramov və Aqşin İsmayılov da yarışda 1-ci yeri tutub. Veteranlar arasında yer alan Ş.Bayramov “deadlift” hərəkətində 240, “benç press” hərəkətində çıxış edən Aqşin İsmayılov isə 290 kq göstərici ilə dünya çempionu olub. Bu nəticilərlə Azərbaycan yığması komanda hesabında 3-cü pillədə qərarlaşıb.