“Qalatasaray”ın ulduz futbolçusu İtaliya klubunun hədəfində

“Qalatasaray”ın danimarkalı müdafiəçisi Viktor Nelsson karyerasını “Roma”da davam etdirəcək.

Türkiyə mətbuatında yayılan xəbərə görə, İtaliya təmsilçisi 26 yaşlı oyunçunu icarə əsasında heyətinə qatacaq.

Sözləşmənin şərtlərinə əsasən, “canavarlar” Viktoru tam transfer etmək hüququna malik olacaq. İddia olunur ki, Nelsson özü də keçidə müsbət yanaşır.

Qeyd edək ki, Viktor Nelsson 2021-ci ilin yayında “Kopenhagen”dən “Qalatasaray”a transfer olunub. Bu müddət ərzində 144 matçda meydana çıxan təcrübəli müdafiəçi 4 qol və 1 məhsuldar ötürmə müəllifi olub.

“Sarı-qırmızılar”la 2 dəfə Türkiyə çempionu olan Viktor ötən il Superkubokda qələbəyə sevinib. İstanbul təmsilçisi ilə müqaviləsi 2026-cı ildə başa çatacaq futbolçunun dəyəri təqribən 14 milyon avrodur.