“Qarabağ” klubu Musa Qurbanlıya əvəzləyici tapdı

“Qarabağ” klubu İsveçin “Yurqorden” kollektivinə keçməyə hazırlaşan Musa Qurbanlıya əvəzləyici tapıb.

Ağdam təmsilçisi “Samsunspor”un Türkiyə əsilli almaniyalı hücumçusu Ahmet Sağatı transfer etmək niyyətindədir.

Bildirilir ki, “köhlən atlar” dəyəri 700 min avro kimi qiymətləndirilən futbolçu üçün artıq rəsmi təklif də göndərib. Lakin 27 yaşlı forvard “Qarabağ”la yanaşı, Belçikanın “Mexelen” kollektivinin də maraq dairəsindədir.

Qeyd edək ki, 2022-ci ildə 171 min avroya “Samsunspor”a qoşulan Ahmet ötən mövsüm 29 oyunda 9 qol vurub. Almaniyanın “Optik” klubunun yetirməsi olan A.Sağat karyerası ərzində “Berliner”, “Lukkenvalde” “Babelsberq” və “Koblenz” komandalarında da top qovub.