Bakı və Tbilisi oxşar problemlə üzləşib | Qərbdən Gürcüstana təzyiqlər səngimir

Siyasi mənada Cənubi Qafqazın ən hərəkətli ölkələrindən biri kimi bilinən Gürcüstanda parlament seçkiləri keçirilir.

Gürcüstan o ölkələrdəndir ki, Azərbaycanla birlikdə enerji, yol infrastruktur layihələrini genişləndirir, ölkələrimiz arasında ticarət dövriyyəsi hər il artır.

Onu da qeyd etmək lazımdır ki, bu ölkədə soydaşlarımızın yaşaması əlaqələrimizin inkişafında xüsusi rol oynayır. Həmçinin ərazi etibarilə elə də böyük olmayan Azərbaycan və Gürcüstan bir-birinə nəhəng qitələrin qapısını açan iki qonşu dövlətdir.

Bakı Tbilisiyə Asiyanın, Tbilisi isə Bakıya Avropanın qapılarını açır. Qlobal dünya proseslərinə təsir edən bu əlaqələrin bünövrəsi isə ulu öndər Heydər Əliyev tərəfindən qoyulub.

Millət vəkili Musa Qasımlı bildirib ki, Azərbaycan həmişə Gürcüstanda müstəqil, güclü dövlətin olmasında maraqlı olub və bundan ötrü heç vaxt səylərini əsirgəməyib:

“Ulu öndər Heydər Əliyev həmin münasibətləri dostluq və mehriban qonşuluq səviyyəsinə gətirib çıxartdı. Bir çox böyük layihələr Gürcüstan ərazisindən keçirilib. Bakı-Tbilisi-Ceyhan əsas ixrac neft boru kəməri, Bakı-Tbilisi-Qars və digər layihələr Gürcüstan ərazisindən keçirilib, bununla da Gürcüstanın həm dövlət müstəqilliyi möhkəmlənib, həm də dünya üçün əhəmiyyəti artıb”.